Rritet numri i vizitorëve të huaj në Shqipëri, kryesojnë italianët

22:44 | 18 Shkurt 2026
E.H

Në dhjetor 2025, strukturat akomoduese në Shqipëri shënuan rritje të ndjeshme të vizitorëve dhe net-qëndrimeve krahasuar me të njëjtin muaj të një viti më parë.

Numri total i vizitorëve u rrit me 27,2%, ndërsa vizitorët e huaj shënuan rritje edhe më të fortë me 47,6%, duke konfirmuar interesin në rritje për turizmin në vend. Po ashtu, net-qëndrimet u rritën me 26,2%, me rritje më të lartë nga turistët e huaj me 39,2%.

Italia mbetet burimi kryesor i turistëve të huaj me 25% të totalit, e ndjekur nga Kosova me 16% dhe Gjermania me 6%, ndërsa norma e shfrytëzimit të dhomave në hotele arriti në 20,4%, nga 18,1% një vit më parë.

Në total, në dhjetor 2025 u regjistruan 65,817 vizitorë rezidentë dhe 107,377 vizitorë jo-rezidentë në strukturat akomoduese, duke treguar rritje të fortë të turizmit hyrës dhe një zgjerim të aktivitetit turistik në vend./euronews.al